ຂ່າວລາຍວັນ

ສະຫາຍ ພົນເອກ ວິໄລ ຫຼ້າຄຳຟອງ ຢ້ຽມຢາມ​ກອງພັນໃຫຍ່ 605

ສະຫາຍ ພົນເອກ ວິໄລ ຫຼ້າຄຳຟອງ ຢ້ຽມຢາມ​ກອງພັນໃຫຍ່ 605

ເນື່ອງ​ໃນ​ໂອກາດ ​ວັນສ້າງ​ກອງທັບ​ປະຊາຊົນ ​ລາວ ຄົບຮອບ 74 ປີ ( 20 ມັງກອນ 1949-20 ມັງກອນ 2023), ສະຫາຍ ​ພົນເອກ ວິໄລ ຫຼ້າຄໍາຟອງ ກຳມະການ​ກົມ​ການເມືອງ​ສູນ​ກາງ​ພັກ,

ຮອງ​ນາຍົກລັດຖະມົນຕີ ລັດຖະມົນຕີກະຊວງ ປ້ອງກັນຄວາມສະຫງົບ ພ້ອມດ້ວຍ​ຄະນະ ໄດ້​ລົງ​ຢ້ຽມຢາມ ກອງພັນໃຫຍ່ 605 ​ໃນ​ວັນ​ທີ 18 ມັງກອນ 2023 ນີ້, ໂດຍ​ການ​ຕ້ອນຮັບ​ຂອງ​ ສະຫາຍ ພັນເອກ ປະເສີດ ທ່ຽງທໍາ ຮອງເລຂາຄະນະພັກ ຫົວໜ້າ​ການທະຫານກອງພັນໃຫຍ່ 605 ພ້ອມດ້ວຍຄະນະ ແລະ ພະນັກງານ-ນັກຮົບ ເຂົ້າຮ່ວມ.

ສະຫາຍ ພັນເອກ ປະເສີດ ທ່ຽງທໍາ ໄດ້​ລາຍງານ​ໂດຍ​ຫຍໍ້ ​ສະພາບທີ່​ຕັ້ງ, ພາລະ​ບົດບາດ ແລະ ຈຸດ​ພິເສດ ຂອງກອງພັນໃຫຍ່ 605 ​ໃນ​ໄລຍະ​ຜ່ານ​ມາ ເຊິ່ງ​ກອງພັນໃຫຍ່ພວກ​ເຮົາ​ມີ​ພາລະ​ບົດບາດ​ເຮັດໜ້າທີ່ໃນການປົກປັກຮັກສາປະເທດຊາດສ້າງຕັ້ງຂຶ້ນສືບເນື່ອງມາຈາກກອງພັນປຶນໃຫຍ່ໜ້າດິນເຊິ່ງເປັນກົມກອງທໍາອິດຂອງເຫລົ່າຮົບປຶນໃຫຍ່ໜ້າດິນກອງທັບປົດປ່ອຍປະຊາຊົນລາວ ສ້າງຕັ້ງຂື້ນໃນ

ວັນທີ 15 ທັນວາ 1954 ຢູ່ເຂດທີ່ໝັ້ນການປະຕິວັດແຂວງ ຫົວພັນ,ພາຍຫຼັງໄດ້ຮັບການສ້າງຕັ້ງກົມກອງໄດ້ເຮັດໜ້າທີ່ປະສານສົມທົບກັບກົມກອງເພື່ອນເຄື່ອນໄຫວຕ່ໍສູ້ກັບສັດຕູຜູ້ຮຸກຮານອັນລະອິດລະອ້ຽວຂ້ຽວຂາດເຕັມໄປດ້ວຍການເສຍສະຫຼະນາໆປະການ ແລະ ມາໃນປີ1984 ກະຊວງ

ປ້ອງກັນປະເທດໄດ້ປະກາດສ້າງຕັ້ງເປັນກອງພັນໃຫຍ່ 605 ເຊິ່ງຜ່ານມາກົມກອງໄດ້ຮັບນາມມະຍົດຕ່າງໆຢ່າງສົມກຽດໃນນີ້ກົມກອງວິລະຊົນ 4 ກົມກອງນາມມະຍົດວິລະຊົນແຫ່ງຊາດ 3 ສະຫາຍ

ນັກຮົບແຂ່ງຂັນ 18 ສະຫາຍ ນອກນັ້ນຍັງໄດ້ຮັບການຍ້ອງຍໍດ້ວຍຮູບການຕ່າງໆຢ່າງສົມກຽດ
ຕະຫຼອດໄລຍະຜາ່ນມາກອງພັນໃຫຍ່ 605 ໄດ້ພ້ອມ​ກັນເອົາໃຈໃສ່​ປັບປຸງ​ກໍ່ສ້າງກົມ​ກອງ​ໃຫ້​ມີ​ຄວາມ​ໜັກ​ແໜ້ນ​ທາງ​ດ້ານ​ການເມືອງ ​ເຂັ້ມແຂງ​ທາງ​ດ້ານ​ການຈັດຕັ້ງ ພ້ອມ​ທັງ​ເຮັດ​ໜ້າທີ່​ກຽມພ້ອມ​ສູ້​ຮົບ ​

ທີ່​ອາດ​ຈະ​ເກີດ​ຂຶ້ນ​ໃຫ້​ທັນ​ເວລາ, ນອກ​ນີ້​ຍັງ​ເປັນ​ກຳລັງ​ຫຼັກ​ແຫຼ່ງ​ໃນ​ວຽກ​ງານ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະຫງົບ ໂດຍ​ສະເພາະ​ໄດ້​​ນຳ​ພາ-ຊີ້ນຳ ບັນດາກົມກອງ ​ລົງ​ສົມທົບ​ກັບ​ອຳນາດ​ການ​ປົກຄອງ​ບ້ານ​ອ້ອມ​ຂ້າງ ປຸກລະດົມ​ປະຊາຊົນ​ເຂົ້າ​ຮ່ວມ​ວຽກ​ງານ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະຫງົບ

ເພື່ອ​ຕ້ານ ແລະ ສະກັດ​ກັ້ນ​ປະກົດ​ຫຍໍ້ທໍ້​ຕ່າງໆ ເຮັດ​ໃຫ້​ສະພາບ​ຂອບ​ເຂດ​ຕົນ​ຮັບຜິດຊອບ​ມີ​ຄວາມ​ສະຫງົບ​ປອດ​ໄພ​ດີ. ນອກ​ນັ້ນ, ​ຍັງ​ໄດ້​ເອົາໃຈໃສ່​ຊີ້​ນຳ​ວຽກ​ງານ​ເພີ່ມພູນ​ຜະລິດຜົນ​ຕາມ​ທິດ​ນຳ 4 ປູກ 4 ລ້ຽງ

ບົນ​ຈິດໃຈ​ເພິ່ງ​ຕົນ​ເອງ, ກຸ້ມ​ຕົນ​ເອງ ແລະ ສ້າງ​ຄວາມ​ເຂັ້ມແຂງ​ດ້ວຍ​ຕົນ​ເອງ ເພື່ອ​ແກ້​ໄຂ​ຊີວິດ​ການ​ເປັນ​ຢູ່​ຂອງ​ພະນັກງານ-ນັກຮົບ​ໃຫ້​ນັບ​ມື້​ດີ​ຂຶ້ນ.

ໂອກາດ​ດັ່ງກ່າວ, ສະຫາຍ ພົນເອກ ວິໄລ ຫຼ້າຄໍາຟອງ ໄດ້​ຫວນ​ຄືນ​ມູນເຊື້ອ​ປະຫວັດ​ຄວາມ​ເປັນ​ມາ​ຂອງ​ວັນ​ສ້າງຕັ້ງ​ກອງທັບ​ປະຊາຊົນ​ລາວ​ໃນ​ໄລຍະ 74 ປີຜ່ານມາ ພ້ອມ​ທັງ​ເນັ້ນ​ໜັກ​ໃຫ້ ​ຄະນະ​ພັກ-ຄະນະບັນຊາ, ພະນັກງານ-ນັກຮົບ ກອງພັນໃຫຍ່ 605 ຈົ່ງ​ເຊີດ​ຊູ​ສະຕິ​ລະວັງ​ຕົວ,

ມີ​ສະຕິ​ໃນ​ການ​ປົກ​ປັກ​ຮັກສາ​ແນວທາງ​ນະໂຍບາຍ​ຂອງ​ພັກ-ລັດ, ປົກ​ປັກ​ຮັກສາ​ໝາກຜົນ​ຂອງ​ການ​ປະຕິວັດ, ສົມທົບ​ແໜ້ນ​ກັບ​ວຽກ​ງານການ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະຫງົບ ແລະ ການ​ສ້າງສາ​ພັດທະນາ​ເສດຖະກິດ-ສັງຄົມ ເພື່ອ​ສືບຕໍ່​ກໍ່ສ້າງ ແລະ ປັບປຸງ​ຕາ​ໜ່າງ​ປ້ອງ​ກັນ​ຊາດ-ປ້ອງ​ກັນ​ຄວາມ​ສະຫງົບທົ່ວ​ປວງ​ຊົນ​ຮອບດ້ານຢູ່​ຮາກ​ຖານ​ໃຫ້​ທົ່ວ​ເຖິງ,

ຍົກ​ສູງ​ສະຕິ​ເປັນ​ເຈົ້າການ​ໃນ​ການ​ປົກ​ປັກ​ຮັກສາ​ທ້ອງຖິ່ນ, ຕ້ານ​ທຸກ​ການເຄື່ອນໄຫວ​ມ້າງເພ​ທຳລາຍ​ໃນ​ຫຼາຍ​ດ້ານ​ຂອງ​ບັນດາ​ອິດ​ທິ​ກຳລັງ​ປໍ​ລະ​ປັກ ແລະ ກຸ່ມ​ຄົນ​ບໍ່​ດີ​ຢ່າງ​ທັນ​ການ ໄປ​ພ້ອມ​ກັບການ​ເພີ່ມ​ທະວີ​ເຮັດ​ວຽກ​ງານ​ກໍ່ສ້າງ​ຮາກຖານ​ການເມືອງ ຕິດ​ພັນ​ກັບ​ການ​ພັດທະນາ​ຊົນນະບົດ​ຮອບດ້ານ​ຕາມ​ທິດ 3 ສ້າງ ກົມ​ກອງ​ຕັ້ງ​ທັບຢູ່​ບ່ອນ​ໃດ

ຕ້ອງ​ເຮັດ​ວຽກ​ງານ​ກໍ່ສ້າງ​ຮາກ​ຖານ​ຢູ່​ບ່ອນ​ນັ້ນ​ໃຫ້​ດີ, ປະກອບສ່ວນ​ຢ່າງ​ຕັ້ງໜ້າ​ເຂົ້າ​ໃນ​ການ​ປັບປຸງ​ລະບົບ​ອຳນາດ​ປະຊາທິປະໄຕ​ປະຊາຊົນ, ປົກ​ປັກ​ຮັກສາ​ສິດ​ເປັນ​ເຈົ້າ​ຂອງ​ປະຊາຊົນ, ໂຄສະນາ​ປຸກລະດົມ​ຂົນຂວາຍ​ປະຊາຊົນ​ໃຫ້​ສາມັກຄີ​ປຸ້ມລຸມ​ກັນ ສ້າງສາ​ພັດທະນາ​ບ້ານ​ຊ່ອງ ແລະ ປະຕິບັດ​ໜ້າທີ່​ປ້ອງ​ກັນ​ຊາດ-ປ້ອງ​ກັນ​ຄວາມ​ສະຫງົບ​ຢູ່​ຮາກ​ຖານ,ປັບປຸງ​ແບບແຜນ​ວິທີເຮັດ​ວຽກ​ໃຫ້​ມີ​ວິທະຍາສາດ​ສອດຄ່ອງ​ກັບ​ໜ້າທີ່​ການເມືອງ​ຂອງ​ຕົນ,

ເຮັດ​ວຽກ​ເປັນ​ໝູ່​ຄະນະ​ແບ່ງ​ໃຫ້​ບຸກຄົນ​ຮັບຜິດຊອບ​ຢ່າງ​ຂາດ​ຕົວ, ສືບຕໍ່​ປົກ​ປັກ​ຮັກສາ ແລະ ເສີມ​ຂະຫຍາຍ​ມູນເຊື້ອ​ອັນ​ດີງາມ​ຂອງ​ຕົນ, ຕັ້ງໜ້າ​ປັບປຸງ​ກຳລັງ​ໃນ​ທຸກ​ດ້ານ​ໃຫ້​ໜັກ​ແໜ້ນ​ ເຂັ້ມແຂງ, ເອົາໃຈໃສ່​ຕໍ່​ການ​ປັບປຸງ​ລະບອບ​ຄຸ້ມ​ຄອງ-ບັນຊາ, ປັບປຸງ​ກຳລັງ​ປະເພດ​ຕ່າງໆ ໂດຍ​ຖື​ເອົາ​ຄຸນ​ນະ​ພາບ​ເປັນຕົ້ນ​ຕໍ.

ໃນ​ນັ້ນ, ຖື​ເອົາ​ຄຸນ​ນະ​ພາບ​ທາງ​ດ້ານ​ການເມືອງ-ແນວ​ຄິດ​ເປັນ​ກົກ, ເອົາ​ຄວາມ​ສາມາດດ້ານ​ວິຊາ​ສະເພາະ​ມີ​ຫົວຄິດ​ປະດິດ​ສ້າງ ແລະ ການຈັດຕັ້ງ​ບັນຊາ ຕ້ອງ​ມີ​ແບບແຜນ ແລະ ປະຕິບັດ​ລະບອບ​ຫັດ​ແອບ ເພື່ອ​ຍົກ​ສູງ​ຄວາມ​ສາມາດ​ທາງ​ດ້ານ​ສິນລະປະ​ຍຸດ-ຍຸດທະວິທີ, ຍົກ​ສູງ​ສະຕິ​ການຈັດຕັ້ງ​ລະບຽບ​ວິໄນ​ໃຫ້​ເຂັ້ມ​ງວດ

ເພື່ອ​ກ້າວ​ໄປ​ເຖິງ​ການ​ກຸ້ມ​ຕົນ​ເອງ​ຢ່າງຮອບດ້ານໃຫ້​ຖື​ເອົາ​ວຽກ​ງານ​ຄຸ້ມ​ຄອງ, ລ້ຽງ​ດູ​ທັບດ້ວຍ​ການ​ສ້າງ​ພະລາທິການ​ກັບ​ທີ່​ເປັນ​ວຽກ​ງານ​ຕົ້ນຕໍ ເພື່ອ​ແກ້​ໄຂ​ຊີວິດ​ການ​ເປັນ​ຢູ່​ໃຫ້​ດີ​ຂຶ້ນ ໂດຍ​ສຸມ​ໃສ່​ດ້ານ​ກະສິກຳ​ທີ່​ເປັນ​ທ່າແຮງ (ການ​ປູກຝັງ, ລ້ຽງສັດ) ໃຫ້​ເປັນ​ຂະ​ບວນ​ກວ້າງຂວາງ,

ໄປ​ຄຽງ​ຄູ່​ກັນ​ນີ້​ຍັງ​ປະຕິບັດ​ຫຼັກການ​ພົວພັນ​ຮ່ວມ​ມື​ກັບ​ປະເທດ​ເພື່ອນ​ມິດ​ຍຸດ​ທະ​ສາດ ເພີ່ມ​ທະວີ​ການ​ຮ່ວມ​ມື​ຮອບດ້ານ​ກັບ​ກອງທັບ​ປະເທດ​ໃກ້​ຄຽງ ແລະ ການ​ຮ່ວມ​ມື​ກັບ​ບັນດາ​ປະເທດ​ສັງຄົມ​ນິຍົມ​ອ້າຍ​ນ້ອງ,

ຍາດ​ແຍ່ງ​ການ​ຊ່ວຍເຫຼືອ​ຈາກ​ສາກົນ ເພື່ອ​ປັບປຸງ​ກໍ່ສ້າງ​ກອງທັບ​ໃຫ້​ກ້າວໜ້າ​ສູ່​ຄຸນ​ນະ​ພາບ​ໃໝ່ ພ້ອມ​ນີ້​ ,ຄະນະ​ດັ່ງກ່າວ​ຍັງ​ໄດ້​ຮັບ​ຊົມ​ການສະແດງ ການທະຫານ ​ຂັ້ນ​ຈຸ​ບຸກ​ຕີ​ຂອງ​ພະນັກງານ-ນັກຮົບ​ວິທະຍາຄານ​ກົມ​ມະ​ດຳ​ຕື່ມ​ອີກ

ໂດຍ ຈັນທະວົງ ອຸ່ນວິໄລຫົງ

Related Articles

Leave a Reply

Your email address will not be published. Required fields are marked *

Back to top button